Algemene Blog

Huisbesoekbrief met die oog op Nagmaal 21 November 2010

Wat doen jy as jy besig is met ‘n persoonlike gesprek en jou selfoon lui?  Wat doen die verkoopsman as jy by ‘n winkeltoonbank staan en die telefoon lui?  Dikwels word die foon geantwoord.  Waarom gebeur dit?  Want dit is MISKIEN dringend, maar is dit noodsaaklik?

In dit wat Jesus vertel sê een van die genooides dat dit noodsaaklik is dat hy na die stuk grond moet gaan kyk wat hy gekoop het.  Daarmee sê hy vir sy gasheer dat dit ‘n verpligting is wat nie gelos kan word nie.  As jy daaraan dink dat die grond klaar gekoop is, was dit werklik noodsaaklik?

Wat is noodsaaklik?  In Kor 9:15-17 maak Paulus dit duidelik dat dit vir hom noodsaaklik is om die evangelie te verkondig omdat dit ‘n taak is wat God aan hom toevertrou het.  En hierdie taak sal hy uitvoer al is die koste ook hoe groot.  Noodsaak het te doen met die eindresultate.  Dit dra by tot die verwesenliking van jou lewensdoel.  Dit verhoog jou waarde, dit dra by tot jou lewenskwaliteit, en die van die mense rondom jou.  Hoeveel aandag gee jy daaraan?

‘n Mens moet dus oordeel of iets dringend is en of dit werklik noodsaaklik is.

As ons nou eerlik gaan kyk na die manier waarop ons ons lewe bestuur, reageer ons op dringende dinge wat on slangs die pad sien, of leef ons op grond van die duidelike plan wat God vir ons lewe gegee het?  Hoe bepaal ek of ek die telefoon gaan antwoord of nie, of ek werk toe gaan of nie, met my kinders speel of nie?  Bybellees en bid of nie …?  Word daar gewerk met die langtermyn doel wat God vir ons het in gedagte, of word jy maar heen en weer gesleep deur elke geberurtenis wat voor jou inspring en spreekwoordelik skree:  ek soek aandag?

Terwyl jy besig is met dringende dinge, word die noodsaaklikes afterweë gelos.  So het die geleentheid wat die genooides met die baie verskonings gehad het om saam met die Koning van al die konings, Jesus Christus te eet, verby gegaan.

Om besig te wees met noodsaaklike dinge, vra moeite.  Dit vat tyd om ‘n verhouding op te bou.  Dit vra tyd om voor te berei vir ‘n loopbaan, dit vra beplanning om met my geld en tyd om te gaan, en dan by daardie NOODSAAKLIKE plan te hou.

Kom ons praat oor eredienste, oor die doelbewuste groei in ons verhouding met God en die ander mense wat vir my saak maak.  Kom ons dink aan die manier waarop ek met geld werk, waarop ek my beloftes teenoor God nakom.  Ly dit skade as gevolg van dringende dinge wat ek toelaat om die noodsaaklike te versmoor?

Wat doen ons nou?  Doen selfondersoek.  Dink aan jou tyd en geld soos jy dit tans spandeer, waarheen gaan dit?  Gaan dit ter wille van jou lewensdoel soos God dit vir jou gegee het?

Die uitnodiging is nog daar:  Gaan sit gou by die Here se voete, en besluit dan wat jy moet doen.

Dr Chris van der Walt, Pietersburg-Suid

So sê die Here, jou Verlosser, die Heilige van Israel: Ek is die Here jou God wat jou onderrig tot jou beswil, wat jou lei op die pad waarop jy moet gaan. 
 
Wat vir my van belang is, is dat God se onderrig nie sonder doel en nie tydelik is nie.  Die onderrig wat God gee is vir ons beswil, want dit is toekomsgerig.  Ons hoop is op Jesus Christus en ons verheerlikte toekoms saam met Hom in die hemel.  Die manier waarop God die volk (kerk) lei, ook in die nuwe testament, is deur Sy verbond met ons.  Ons staan in verbondenheid met Jesus Christus en word deur Sy oorwinning oor die sonde/dood deur Hom geregverdig, nie alleen in 'n sekere tydsvak nie, maar ewig, deur geslagte heen.
 
Daarom is ons verbintenis met God deur Jesus Christus vir ons sekerlik van die allergrootste belang.  Dit is onskatbaar - ons kan niks op aarde daarmee vergelyk nie.  Ongelukkig is dit nie wat ons sien in die praktykmaking van party van die gelowiges op aarde nie.  Daar word nie moeite gedoen om die kinders te onderrig in die heerlike waarheid en belofte van God se redding vir ons nie.  Daarom dat ons ook lees van God se oordeel in hierdie verband, bv in Jeremia 32:18:
  
U bewys u troue liefde aan duisende geslagte, maar U straf kinders vir die sondes van hulle ouers. Groot en magtige God, u Naam is Here die Almagtige. 
 
Ek dink dat baie mense probleme het met die "sondes van die ouers" wat aan die kinders toegereken word.  Kortom is dit nie eintlik 'n misterie nie.  'n Moontlike verklaring daarvan kan wees dat ouers wat nalaat om hulle kinders in die vrese van die Here op te voed, m.a.w. wat nie hul doopbelofte nakom om die kinders in hulle geloofslewe te onderrig nie, moet nie verbaas wees as hulle kinders ongehoorsaam en kerkloos is, en hulle met baie dinge teleurstel nie. 
  
Hoe staan jy in jou saak voor God met betrekking tot jou kinders se geloofsonderrig? 
  
Maak dit vandag nog 'n saak van gebed en erns!   

Wat is die betekenis van die Reformasie vir ons as gelowiges in die 21ste eeu?  Wel, dit is nie net 'n saak van terug na die Woord nie, maar ook 'n saak van wat ek as gelowige te wagte is en waarop ek hoop.
 

Die hooftemas van die Reformasie help ons as rigtingwysers om die pad van die ware geloof raak te sien:
 

• Die Skrif alleen,
• Die geloof alleen,
• die genade alleen,
• Christus alleen,
• en alles tot eer van God

 
Maar waarheen wys dit alles?
 

Dit wys na ons hoop en erfenis.  1 Kor 15:19 stel dit baie duidelik - As ons net vir hierdie lewe op Christus hoop, dan is ons die ellendigste van alle mense.  Met ander woorde, Christus is nie alleen die behouer van die lewe in hierdie bestaan nie, maar veral is Hy ons hoop vir ons bestaan in die hemel na hierdie lewe. 
 

En tereg sluit hoofstuk 15 met hierdie woorde: 
 

Daarom, my geliefde broeders, wees standvastig, onbeweeglik, altyd oorvloedig in die werk van die Here, omdat julle weet dat julle arbeid in die Here nie tevergeefs is nie.
 

Ons hoop is Christus, en dit sien ons ook duidelik in die Reformasie wat ons pas gevier het.

Hierdie is 'n algemene blog vir ons blad.  Ons Koning Jesus Christus het ons hier op aarde tot die geloof geroep met die verantwoordelikheid om as profete, konings en priesters in Sy Naam te regeer.  Daarom skryf ons alleen dit wat Sy Koninkryk tot eer strek, opbou en verheerlik.